Ака уйăхĕн 26-мĕшĕнче Етĕрнери 3-мĕш вăтам шкулта чăваш чĕлхине халалланă «Уççăн янăра, чăваш чĕлхи!» смотр-конкурс иртрĕ. Çак конкурса икĕ номинаципе ирттерчĕç: «Чи лайăх вулавçă», «Чи лайăх юрăçă.» Кашни шкултанах вĕрентекенсемпе вĕренекенсем хутшăнчĕç. Тăван чĕлхене юратакансем, унăн малашлăхĕшĕн тăрăшакансем илемлĕ юрăсем шăрантарчĕç тата артистсенчен кая мар сăвăсемпе юптарусем вуларĕç. Мăн Явăш шкулĕ те çак конкурса хаваслансах хутшăнчĕ, йышĕ те пĕчĕкех пулмарĕ. 7 класра вĕренекен Николаева Венера В.Станьялăн «Камсем эпир?» сăввине пысăк туйăмпа вуларĕ, «Илемлĕ, илемлĕ...» юрра чуна тивмелле юрласа пачĕ. Яковлев Андрейпа Иванова Нелли – кĕçĕн класс ачисем те унран юлмарĕç, ырă ята тивĕçрĕç. Уяв пурне те килĕшрĕ: чăн та, уççăн янăрарĕ чăваш чĕлхи. Ку çĕнĕлĕхе йăлана кĕртме йышăнса хăварчĕç конкурса хутшăнакансем.