Чăваш Республикинче 1992 çултанпа ака уйăхĕн 25-мĕшĕнче Чăваш чĕлхи кунне паллă тăваççĕ. Çак кун чăвашсен паллă педагогĕ, çыравçи, ăсчахĕ Иван Яковлевич Яковлев çуралнă.  Кăçал  вăл çуралнăранпа 168 çул çитет. Акă каллех ака уйăхĕн 19-мĕшĕнче йăлана кĕнĕ „Тăван чĕлхе – пĕлÿ çăл куçĕ” чăваш чĕлхипе литература эрни пуçланчĕ. Пирĕн шкулта ăна директор çумĕ Сидорова М.В. уçрĕ. Вăл линейкăна пухăннă ачасене тăван чĕлхепе литература эрни пуçланнă ятпа саламларĕ, пурне те хастар хутшăнма чĕнчĕ. Хамăр халăх чĕлхине, историне, йăли-йĕркине лайăх пĕлсен, хисеплесен çеç ача культурăллă çын пулса ÿсме пултарнине асăрхаттарса хăварчĕ. Эрнен ĕç планĕпе Васильева Т.М. вĕрентекен паллаштарчĕ. Ĕçĕсем нумай та интереслĕ. Вĕренекенсем хăйсен пултарулăхне, чĕлхе пĕлĕвне туптама, тĕрлĕ конкурссенче çĕнтерсе грамотăсемпе парнесене тивĕçме пултараççĕ. 6 класра вĕренекен Яковлев Андрей вара хăй çырнă „Чăвашлăха савса юрлатăп” сăввипе паллаштарчĕ.  Линейка Чăваш Республикин Гимне юрланипе вĕçленчĕ. Тÿрех ĕçе тытăнтăмăр тесен те йăнăш пулмасть. 6 класра вĕренекен Яковлев Андрейпа 7 класра вĕренекен Алексеев Антон район ирттерекен Ĕç çыннин çулталăкне халалланă „Ĕçне кура хисепĕ”  интернет – олимпиадăна хутшăнчĕç.