Чăваш Республикинче 1992 çултанпа ака уйăхĕн 25-мĕшĕнче Чăваш чĕлхи кунне паллă тăваççĕ. Çак кун чăвашсен паллă педагогĕ, çыравçи, ăсчахĕ Иван Яковлевич Яковлев çуралнă.  Кăçал вăл çуралнăранпа шăпах 175 çул çитет. Акă каллех ака уйăхĕн 18-мĕшĕнче йăлана кĕнĕ «Тăван чĕлхе – пĕлÿ çăл куçĕ» Чăваш чĕлхипе литература эрни пуçланчĕ. Тĕллевĕ: ачасене Аслă Вĕрентекенĕмĕрĕн пурнăçĕпе манăçми ĕçĕ-хĕлĕ çинчен ытларах пĕлме хавхалантарасси, хамăр халăх чĕлхине, историне, йăли-йĕркине хисеплеме, юратма вĕрентесси. Эрнен ĕç планĕпе Васильева Т.М. вĕрентекен паллаштарчĕ. Чăваш чĕлхипе литература эрни пуçланнă май паян, ака уйăхĕн 18-мĕшĕнче, Мăн Явăшри тĕп шкулта вĕренекенсем „Хĕвел çулĕпе” фильм  пăхрĕç.   Сценарине Марина Карягина çыравçă хатĕрленĕ. Фильм Иван Яковлевич Яковлевăн ачалăхĕ çинчен каласа парать. 9 класс ачисем Яковлев ячĕллĕ университет ирттерекен чăвашсен паллă вĕрентекенĕ И. Я. Яковлев çуралнăранпа 175 çул çитнине халалланă „Иван Яковлевăн халалĕ” олимпиадăна хутшăнчĕç.